Leon na Seice ag seinm Chláirseach na hÉireann
LEON NA SEICE I nGLEIC LE CLÁIRSEACH NA hÉIREANN
MACHNAÍM, DÁ BHRÍ SIN, SCRÍOBHAIM  
Luan
11
Bealtaine
2015

Tá sé chomh simplí sin

Balla BheirlínAn chéad uair a bhí mé i mBeirlín, sna 1980í a bhí sé agus bhí mé 11 nó 12 bliain d’aois. Bhí mo mhuintir agus mise ar ár mbealach chuig ár laethanta saoire cois mara i dtuaisceart na Gearmáine Thoir. Agus muid ag tiomáint ó thuaidh rinne muid sos i mBeirlín.

Beirlín Thoir atá i gceist, dar ndóigh. Ní raibh cead ag ár leithéidí dul go dtí an taobh thiar den bhalla a bhí ag roinnt na cathrach ina dhá leath. Is cuimhin liom go bhfaca mé an balla ó taobh thoir. Chuaigh sé i bhfeidhm orm mar tuigeadh dom, don chéad uair i mo shaol, nár dhuine saor mé.

Ní raibh mé i mBeirlín riamh ina dhiaidh sin go dtí go ndeachaigh mé ann arís an tseachtain seo caite. Is cuma cén gnó a bhí agam ann, an rud is tábhachtaí ná nach bhfuil an balla ann níos mó. Ceann de na chéad rudaí a rinne mé ná dul go Geata Brandenburg, an áit a mbíodh an chuid ba cháiliúla den bhalla. Shiúil mé, go mall meáite, faoin Gheata agus thrasnaigh mé go Beirlín Thiar. Ansin shiúil mé ar ais. Agus ar ais arís. Agus arís. Toisc gur duine saor mé.

Domsa agus do na glúnta daoine a rugadh ar an taobh thoir den Chuirtín Iarainn le linn an Chogaidh Fhuair, is é is saoirse dúinne ná bheith ábalta siúl siar soir, soir siar gan ballaí ná cuirtíní sa bhealach orainn. Tá sé chomh simplí sin.

comments powered by Disqus
Creative Commons License
Tá na haltanna ar an bhlag seo faoi chóipcheart agamsa, Michal Boleslav Měchura, mura bhfuil a mhalairt ráite. Tá cead ag gach duine na haltanna seo a athúsáid cibé bealach is mian leo, iad a chur i gcló i bhfoilseacháin eile fiú, ach cloí le forálacha Creative Commons Attribution-ShareAlike 3.0 Ireland License.
RSS RSS